Fantasy

既然鍾意睇世界盃，就要講下世界波！！

1)做領隊的想法一定要跟全世界的人不一樣，才是領隊的材料；一如艾歷臣安排高治打前鋒，全世界餵波比佢頂波，唉！巴拉圭兩個矮過佢嘅後防都可以頂贏佢，最慘係頂唔到頂唔入都冇人後上，英超踢到出晒火嘅兩位"特"哥都唔知去咗邊？？搞到下半場未完，我已經想瞓，艾爺，唔該諗多啲戰術啦！！好悶......

2)講起兩位"特"哥，未開波已經擔心佢哋兩個同場會點踢，一個謝拉特，一個林伯特，兩個都係中場要人，進可攻，退可守，都有好強嘅入球能力，如果硬要六四之分嘅，謝拉特進攻可以表現得好啲，林伯特防守會隱健啲，但係差之分毫，始終都唔建議兩個一齊落場，同場上映感覺你推我讓，究竟個波邊個去踢好呀？！諗諗佢....

睇到好多forum都有相同意見，偏偏艾歷臣唔係咁諗，所以祝又被稱為實力最強一屆嘅英格蘭，旗開得勝！！

3)德國隊有前無後，打死罷就；連阿叔林尚義今人都棄德投西，唔通因為佢唔鍾意領隊奇連士文得個靚仔樣，擺唔出佢個心水陣？查實睇完第一場，德國功力真係好強，拿姆其實係進攻後防，芬寧斯同高路斯仲球球世界波。有人話，比無個人技術又冇組織力嘅哥斯達黎加入到兩粒，德國隊要小心後防不足，殺入後段面對強隊未必有咁多波入，我覺得又未必，頭場踢得咁靈活除咗攻力強，可能係因為冇波歷克中場分波，如果球球都比佢分就未必咁好睇，所以關鍵在於波歷克。

4)墨西哥攻力又係話好強，都信信地，1.63米都可以頭鎚頂入一球，可以話係伊朗後防渣，但係矮細嘅球員都有咁強嘅入球觸角，就唔係身材、實力嘅問題，而係贏波意識最重要喇！

5)杜奧巴輸比基斯普，唔緊要！畢竟科特迪瓦整體實力係弱過阿根廷，最緊要踢左場好波比球迷睇，仲學識咗原來科特迪瓦即係象牙海岸。

6)荷蘭係我今屆嘅心頭好第一位(潛意識係西班牙)，睇返琴晚精華，洛賓的而且確好sharp，但係小勝一球好似未見功力，抑或全隊都仲係傷傷地狀態未到？

7)潛意識鍾意西班牙，因為我一心諗住西班牙對塞黑，一味想送西班牙上戰場，原來要last一組先輪到佢哋，首場對舒夫真高領軍嘅烏克蘭，比心機喇喂！！唔好踢到上屆對愛爾蘭咁，要祈禱捍衛你哋呀....